Meksikada noqonuniy ferma fosh etildi 🇲🇽

Meksika huquq-tartibot xodimlari Puebla shtatidagi tog'li hududda joylashgan shubhali kirtovalyuta mayning fermasiga qarshi reyd uyushtirdi. Maxsus operatsiya davomida obyektdan taxminan 300 ta grafika protsessori (GPU) musodara qilindi. Huquq-tartibot idoralari ushbu qurilmalar elektr energiyasini noqonuniy yo'l bilan o'zlashtirgani va jinoyat olami bilan bog'liq mablag'larni yuvish ishlariga aloqadorligini tekshirmoqda.

Tlaola munitsipalitetidagi uzoq va izolyatsiya qilingan hududda o'tkazilgan tekshiruv vaqtida tergovchilar sanoat miqyosidagi uskunalar, jumladan 80 ta o'rta kuchlanishli terminal, sakkizta sun'iy yo'ldosh antenkasi hamda maxsus transformatorni aniqlashdi. Rasmiylarning ta'kidlashicha, mazkur manzil 2025 yil boshidan beri ushbu hududda topilgan to'rtinchi shunday yashirin mayning maydonchasi hisoblanadi.

Mahalliy aholi binodan bir kilometr uzoqlikkacha eshitilib turadigan kuchli shovqin haqida xabar bergan. Puebla xavfsizlik boshqarmasi rahbari Fransisko Sanches Gonsalesning so'zlariga ko'ra, obyektning yuqori quvvat sarfi, tinimsiz ovozi va olisda joylashgani huquq-tartibot idoralari e'tiborini tortgan. Mutaxassislar ushbu texnikalar yaqin atrofdagi gidroelektrostansiya tizimidan tok olganini tekshirmoqda.

Meksika qonunchiligida raqamli valyuta mayningi taqiqlanmagan bo'lsa-da, mazkur jinoiy ish elektr energiyasini talon-taroj qilish va noqonuniy daromadlarni legallashtirish gumonlari bilan olib borilmoqda. Hozircha tergov organlari biron bir uyushgan guruhni aniqlamagan, hamyon manzillarini e'lon qilmagan va hech kimni hibsga olmagani haqida ma'lumot bergan.