Vivaldi rahbari kriptovalyutalarni tanqid qildi 🛑

Vivaldi kompaniyasining asoschisi va bosh direktori Yon fon Techner kriptovalyutalarni butunlay taqiqlash kerakligini ma’lum qildi. Uning so‘zlariga ko‘ra, mazkur sohada qat’iy tartibga solish mexanizmlarining yo‘qligi sanoat kompaniyalariga siyosatchilarga ta’sir ko‘rsatish hamda demokratik institutlarga tahdid solish imkonini bermoqda. Opera Software sobiq rahbari mutaxassislar bu oqibatlar haqida oldindan ogohlantirgani, biroq bugunga kelib katta moliyaviy zaxiralarga ega bo‘lgan kriptokompaniyalar ayrim siyosatchilarni sotib olishga qodir bo‘lib qolganini ta’kidladi.

Fon Techner bu holatni brauzerlarda foydalanuvchi profillari orqali maqsadli reklama va tavsiya algoritmlarini qo‘llashdagi me’yoriy bo‘shliqlar bilan bog‘ladi. Uning fikricha, jamiyat allaqachon bunday qarorlarning demokratiyaga keltirib chiqarayotgan salbiy oqibatlariga duch kelmoqda. Shu bilan birga, tadbirkor sun’iy intellekt sohasi bilan ham o‘xshashliklar borligini qayd etdi. Uning so‘zlariga ko‘ra, ijtimoiy tarmoqlar kabi, sun’iy intellekt kompaniyalari ham potentsial zararli amaliyotlarni o‘zlari to‘xtata olmagani sababli hukumatni ularni tartibga solishga chaqirmoqda.

Technerning bu bayonoti uning kriptovalyutalarga qarshi yillar davomida bildirib kelayotgan tanqidlarining davomi hisoblanadi. Masalan, 2022-yil boshida u raqamli aktivlar atrofidagi shov-shuv ortida "valyuta niqobini kiygan piramida" yotganini yozgan edi. Shuningdek, tadbirkor kriptovalyutalarning keskin narx tebranishlari, mayning jarayonining yuqori darajada energiya talab qilishini va amaliy qo‘llanilish doirasi tushunarsiz ekanini bir necha bor ko‘rsatib o‘tgan.

Bundan tashqari, u foydalanuvchilarni kuzatishga asoslangan reklama turlarini taqiqlash taklifini ham ilgari surgan edi. Uning fikricha, Big Tech kompaniyalarining ma’lumotlar yig‘ishga tayanadigan biznes modeli demokratiyani yemirmoqda. Eslatib o‘tamiz, avvalroq Anthropic rahbari Dario Amodei, OpenAI bosh direktori Sem Altman va xAI rahbari Ilon Mask ham sun’iy intellekt texnologiyalarini ishlab chiqish jarayonini sekinlashtirishga chaqirgan edi.