MDH oʻyinlari: Ikkinchi oʻrin 🥈

Rossiyaning Qozon shahrida boʻlib oʻtayotgan MDH oʻyinlarida Oʻzbekiston sport delegatsiyasining muvaffaqiyatli ishtiroki davom etmoqda. Musobaqaning navbatdagi kun bahslari yakuniga koʻra, terma jamoamiz vakillari oʻz hisobiga yana qator nufuzli mukofotlarni yozib qoʻyishdi.

Ahamiyatli jihati shundaki, ushbu kunda qoʻlga kiritilgan barcha medallar sambo sport turi doirasidagi bellashuvlarga toʻgʻri keldi. Shiddatli kechgan bahslarda hamyurtlarimiz 1 ta oltin, 7 ta kumush hamda 4 ta bronza medallariga sazovor boʻlishdi.

Xususan, sambo boʻyicha -50 kg vazn toifasida bahs olib borgan Sabina Davlatova barcha raqiblarini yengib, oltin medalni qoʻlga kiritdi. Shuningdek, -64 kg vazndagi Shaxriyor Mamatqulov, -71 kg dagi Musoxon Ziyadinov, -79 kg dagi Xudoyor Ibroyimov, +98 kg dagi Ruslan Rastamov, shuningdek qizlar oʻrtasida -54 kg dagi Shoxida Xontoʻrayeva, -59 kg dagi Azada Aymuratova va +80 kg dagi Sevara Shamsiddinova kumush medallarga sazovor boʻlishdi.

Bundan tashqari, -98 kg vazndagi Murod Erkinov, -65 kg dagi Shohista Amirova, -72 kg dagi Begoyim Xayitova hamda -80 kg vazn toifasidagi Charos Ozodova bronza medallarini qoʻlga kiritgan holda shohsupaga koʻtarilishdi.

Mazkur natijalardan soʻng Oʻzbekiston sportchilari hisobidagi umumiy medallar soni 16 ta oltin, 25 ta kumush va 18 ta bronzani tashkil etmoqda. Ayni paytda delegatsiyamiz umumjamoa hisobida musobaqa mezbonlaridan keyingi ikkinchi pogʻonani muvaffaqiyatli saqlab turibdi.