Qon bosimini dori-darmonsiz tushirish yoʻli 🩺

Amerikalik olimlar qon bosimini dori-darmonlarsiz pasaytirishning samarali usuli haqida ma’lum qilishdi. Daily Express nashrining yozishicha, Mayo klinikasi mutaxassislari past intensivlikdagi hamda qisqa muddatli mashqlar yuqori qon bosimini tushirishga yordam berishini aniqlashgan.

Ushbu usuldan gipertoniya kasalligining oldini olish profilaktikasida ham foydalanish mumkinligi ta’kidlanmoqda. Mutaxassislarning ma’lum qilishicha, bunday mashgʻulotlarni muntazam ravishda har kuni 12 daqiqa davomida bajarib borish talab etiladi.

Mazkur jismoniy harakatlar ma’lum bir mushak yoki bir nechta mushaklar guruhining qisqarishiga qaratilgan boʻladi. Bunda mashqlar muayyan holatda harakatsiz ravishda bajarilishi xabarda qayd etilgan.

Shifokorlar gipertoniya kasalligi koʻp hollarda oʻzini hech qanday alomatlar bilan namoyon qilmasdan kechishini eslatib oʻtishdi. Biroq, bu holat xavfli boʻlib, yurak-qon tomir kasalliklari xavfini keskin oshiradi va oqibatda oʻlimga olib kelishi hech gap emas.