Intel High-NA EUV da 1 million plastinadan o'tdi 📈

Intel kompaniyasi va ASML yaqinda bo'lib o'tgan konferensiyada muhim marraga erishilganini e'lon qildi. Unga ko'ra, Intel ASMLning High-NA EUV skanerlarida 300 millimetrli bir milliondan ortiq plastinani qayta ishlashga muvaffaq bo'ldi 📱 Ushbu ko'rsatkich ilmiy-tadqiqot ishlari, uskunalarni sertifikatsiyalash va Panther Lake nomi bilan tanilgan Core Ultra Series 3 protsessorlarini ommaviy ishlab chiqarish jarayonlarini o'z ichiga oladi.

ASML rasmiylarining ta'kidlashicha, dunyo bo'ylab ularning High-NA tizimlari yordamida jami 1,35 millionga yaqin plastina ishlangan. Mazkur qurilmalar to'rtta mijozda ishlayotgani va yana uchtasi yetkazib berilayotgani yoki o'rnatilayotgani hisobga olinsa, Intelning ulushi global ko'rsatkichning qariyb 74 foizini tashkil etishi ma'lum bo'ladi.

Bozor ishtirokchilari uchun bu muhim ahamiyatga ega, chunki Intel High-NA texnologiyasidan tijorat mahsulotlarida foydalanayotgan yagona kompaniya hisoblanadi 🏭 Raqobatchilar, jumladan TSMC bunday texnologiyani ommaviy ishlab chiqarishga faqat 2030-yilda kirishni rejalashtirgan. Narxi 350 million dollargacha bo'lgan ushbu uskunalarga katta mablag' tikkan Intel hozircha birinchilikni qo'lda saqlab turibdi.