Hakan Fidan Putin bilan uchrashdi 🇷🇺

Turkiya tashqi ishlar vaziri Hakan Fidan rasmiy tashrif bilan Rossiyada bo'lib turibdi. Ushbu safar doirasida Rossiya Federatsiyasi Prezidenti Vladimir Putin turkiyalik vazirni qabul qildi. Turkiya vaqti bilan soat 19:30 da boshlangan mazkur uchrashuv yakuniga yetdi va qariyb bir soat davom etdi.

Tomonlar o'rtasidagi muzokaralarda Rossiya va Ukraina o'rtasidagi urushni to'xtatishga qaratilgan so'nggi sa'y-harakatlar hamda 16-may kuni Istanbulda o'tkazilgan muzokaralardan keyingi vaziyat atroflicha ko'rib chiqildi. Shuningdek, uchrashuv davomida ikki mamlakat o'rtasidagi iqtisodiy va energetika masalalari yuzasidan ham fikr almashildi.

Tashqi ishlar vazirligi manbalarining ma'lumot berishicha, Hakan Fidanning 26-27-may kunlari davom etadigan safari doirasida o'zining rossiyalik kasbdoshi Sergey Lavrov bilan ham uchrashuvi ko'zda tutilgan. Bundan tashqari, vazirning Rossiya Mudofaa vaziri Andrey Belousov va boshqa yuqori martabali rasmiylar bilan ham ikki tomonlama muzokaralar o'tkazishi rejalashtirilgan.

Bo'lib o'tayotgan ushbu uchrashuvlarda mintaqaning ikki muhim o'yinchisi bo'lgan Turkiya va Rossiyaning o'zaro aloqalari batafsil muhokama qilinishi kutilmoqda. Xususan, savdo, energetika va turizm kabi asosiy hamkorlik yo'nalishlaridagi mavjud holat tahlil qilinib, keyingi qadamlar yuzasidan baho berilishi ko'zda tutilgan.

Shuningdek, Fidan Turkiyaning Rossiya-Ukraina mojarosida adolatli va bardavom tinchlikni o'rnatishga sodiqligini yana bir bor alohida ta'kidlashi kutilmoqda. Muzokaralarda so'nggi paytlarda kuzatilgan muhim o'zgarishlar tufayli tinchlik jarayonining shu yo'nalishda olg'a siljiyotgani mamnuniyat bilan qayd etilishi rejalashtirilgan.