SZBOX yangi 14 dyuymli 2si1 qurilmani taqdim etdi 💻

SZBOX kompaniyasi oxirgi paytlarda qator yangi qurilmalarni, jumladan S7 mini-kompyuterini taqdim etgan edi. Endilikda ishlab chiqaruvchi o‘z e’tiborini MINISFORUM V3 hamda Surface Pro 11 modellariga raqib bo‘la oladigan yangi gadjetga qaratdi, biroq uning narxi ancha past etib belgilangan. Tashqi o‘lchamlari va texnik xususiyatlariga ko‘ra, SZBOX mahsuloti 14 dyuymli ekrani hamda AMD protsessori tufayli aynan MINISFORUM V3 qurilmasiga ko‘proq o‘xshab ketadi. Shunga qaramay, mazkur yangi qurilma raqibiga nisbatan kamroq unumdorlikka ega bo‘lishi kutilmoqda.

Xususan, ishlab chiqaruvchi o‘z qurilmasini bundan ikki yil muqaddam e’lon qilingan Ryzen 3 7320U chipi bilan ta’minlagan. Mendocino-U turkumiga mansub ushbu protsessor atigi to‘rtta Zen 2 yadrosi hamda ikkita RDNA 2 hisoblash blokiga ega Radeon 610M grafik yadrosini o‘z ichiga oladi. Shu sababli, mazkur protsessor va grafik tezlatgich zamonaviy o‘yinlarning aksariyati uchun mos kelmasligi ta’kidlanmoqda.

Qurilma 16:10 nisbatdagi va 2560x1440 piksel sig‘imga ega 14 dyuymli IPS displey bilan jihozlangan bo‘lib, uni 45.6 Vt-soat quvvatga ega akkumulyator energiya bilan ta’minlaydi. O‘lchamlari 311.1 x 235.1 x 10.7 millimetrni tashkil etuvchi gadjet LPDDR5 tezkor xotirasi, M.2 2242 formatidagi qattiq disklar va ikkita USB Type-C portini o‘zida mujassam etgan.

Hozirgi vaqtda SZBOX mazkur 2si1 gadjetini 12 gigabayt operativ va 512 gigabayt doimiy xotira jamlanmasi bilan taxminan 371 AQSh dollari evaziga sotuvga chiqargan. Biroq bu narxga import soliqlari hali kiritilmagan. Shuningdek, reklama suratlarida ko‘rsatilgan ajralib turuvchi klaviatura aksessuari qurilma jamlanmasiga qo‘shib berilishi yoki berilmasligi hozircha noma’lumligicha qolmoqda.