Sony Hideo Kojimaning "Physint" loyihasidan nima sababdan voz kechdi? 🎮

Sony kompaniyasi afsonaviy o'yin dizayneri Hideo Kojima bilan hamkorlikni to'xtatib, uning yangi "Physint" loyihasidan voz kechgani haqida xabarlar tarqaldi. Bloomberg nashrining ma'lumotlariga ko'ra, bu qarorga asosiy sabab sifatida byudjet bilan bog'liq xavotirlar va ishlab chiqish muddatlarining doimiy ravishda kechiktirilgani ko'rsatilgan. Mutaxassislar fikricha, o'tgan davr mobaynida "Concord" va "The Last of Us Online" kabi qimmatbaho loyihalarning muvaffaqiyatsizligi hamda "Marathon" o'yinining qiyinchiliklari Sony'ni xarajatlarni qattiqroq nazorat qilishga majbur qilgan.

Nashrning ta'kidlashicha, "Physint" o'yini relizgacha hali yillar qolganiga qaramay, belgilangan muddatlardan ortda qolgan va byudjetni sezilarli darajada oshirib yuborish ehtimoli yuqori bo'lgan. Shuningdek, "Death Stranding 2" o'yinining tijoriy ko'rsatkichlari kutilganidan past kelgani, ya'ni uning savdolari tezda sekinlashgani va daromadi birinchi qismnikidan kamligi ham ushbu qarorga ta'sir ko'rsatgan omillardan biri bo'lgan.

Bulardan tashqari, Sony kompaniyasi o'zining yakkaxon o'yinlarini shaxsiy kompyuterlarga chiqarish siyosatini qayta ko'rib chiqayotgani hamda PlayStation rahbariyatida Kojima bilan avval ishlagan mas'ullarning almashgani ham muzokaralarga o'z ta'sirini o'tkazgan. Sony loyihadan voz kechgach, uni Microsoft kompaniyasi o'z nazoratiga oldi. Xbox rahbariyati ushbu loyihani nafaqat yaxshi sarmoya, balki kelgusida uni kino va televideniye sohalariga ham kengaytirish imkoniyati sifatida baholamoqda.

Mutaxassislarning fikricha, bunday qadam sodiq o'yinchilar orasida PlayStation obro'siga salbiy ta'sir ko'rsatishi mumkin, biroq moliyaviy nuqtai nazardan Sony o'z pozitsiyasini tushuntira oladi. Hozirda Hideo Kojimaning navbatdagi ishi Xbox uchun mo'ljallangan "OD" loyihasi bo'lib turibdi, biroq uning chiqarilish sanasi hali e'lon qilinmaganiicha qolmoqda.