🦗 Ўзбекистонда чигиртка етиштирилмоқда

Сингапурнинг Entomo Ventures компанияси томонидан Ўзбекистонда истеъмолга яроқли бўлган чигирткаларни кўпайтириш ишлари амалга оширилмоқда. Бу ҳақда Deep Food Tech Conference анжуманида компания вакили Алексей Проничкин батафсил маълумот бериб ўтди. Унинг сўзларига кўра, Европа давлатларида бу каби ҳашаротлар тайёр консервалар кўринишида харидорларга таклиф этилмоқда.

Маҳсулотлар туркуми жуда кенг бўлиб, чигиртка унидан турли енгил таомлар, кулчалар, шоколадлар, шунингдек, протеин шариклари, печенье ва пасталар ишлаб чиқарилмоқда. Мутахассисларнинг таъкидлашича, чигирткалар таркибида оқсилдан ташқари темир, фосфор, магний, кальций ҳамда А, B2 ва C витаминлари мавжуд. Хусусан, улардаги кальций миқдори сутдагидан, темир эса исмалоқдагидан ҳам кўплиги айтилмоқда.

Ўзбекистондаги лойиҳанинг ўзига хослиги шундаки, ҳашаротлар катта класиc фермаларда эмас, балки махсус контейнерлар ёрдамида етиштирилади. Бундай контейнерлар қишлоқ аҳолисига берилиб, етиштирилган ҳосил марказий фермага топширилади ва у ерда қайта ишланади. Бу эса ортиқча харажатларни қисқартириб, фермерларга барқарор даромад олиш имконини беради.

Проничкиннинг қайд этишича, Ўзбекистон иқлими бундай фаолият учун жуда мос келади ва ҳукумат ҳам бунга ижобий ёндашган. Компания барча зарур рухсатномаларни олган. Ўзбекистон ушбу маҳсулотларни, хусусан, Европага экспорт қилишдан манфаатдор экани ҳамда зарур қонунчилик ўзгартиришлари ва ТNVED класификацияси тезкорлик билан ҳал этилгани айтилди.