iOS 19 operatsion tizimida nima o‘zgaradi? 📱

Bloomberg nashrining taniqli insayderi va jurnalisti Mark Gurman Apple kompaniyasining navbatdagi yirik operatsion tizim yangilanishi haqidagi qiziqarli ma'lumotlarni bo‘lishdi. Avvalroq ham u iOS 19 tizimida jiddiy o‘zgarishlar bo‘lishini aytgan edi, biroq endi tayyorgarlik jarayonining ayrim tafsilotlari ma'lum bo‘ldi.

Mutaxassisning ta'kidlashicha, tarmoqda tarqalgan dastlabki sizdirilgan ma'lumotlar va renderlar operatsion tizimning ilk versiyalariga asoslangan bo‘lishi mumkin. Yakuniy versiya esa biroz farq qilishi kutilmoqda. Apple oldiga iOS, iPadOS hamda macOS platformalaridagi barcha tugmalar, menyular, ilovalarni yopish elementlari va dok panelining ish faoliyatini yagona standartga keltirish vazifasini qo‘ygan.

Yangilanish davomida interfeysga turli xil shaffoflik effektlari kiritiladi. Shuningdek, ba'zi dasturlar yangi avlod foydalanuvchilariga moslashishi hamda inson va qurilmalar o‘rtasidagi ekotizimni yanada yaxlit qilish uchun qayta ishlanadi. Gurmanning fikricha, bu o‘zgarishlarga biroz ko‘nikish talab etilsa-da, oxir-oqibat ko‘pchilikka manzur keladi.

Jurnalistning qo‘shimcha qilishicha, barcha ilovalar ham birdek o‘zgarmasligi mumkin, biroq asosiy dasturlarning interfeys elementlari visionOS uslubini eslatuvchi ko‘rinishga olib kelinadi. Bu ikkala platforma o‘rtasida o‘xshashlikni yaratib, butun interfeys bo‘ylab shaffof shisha effektlarini joriy etishga yordam beradi.

Apple ushbu yangi operatsion tizim tafsilotlarini va uning haqiqiy qiyofasini joriy yilning iyun oyi boshida bo‘lib o‘tadigan an'anaviy WWDC 2025 konferensiyasida rasman taqdim etadi.