Windows Recall Intel va AMD qurilmalariga keldi 🖥️

Windows operatsion tizimining ko'p bahs-munozaralarga sabab bo'lgan Recall funksiyasi o'zining rivojlanish bosqichida navbatdagi muhim qadamni tashladi. Dastlab dabdaba bilan e'lon qilingan, tanqidlardan so'ng qayta ishlash uchun vaqtincha olib tashlangan va keyinchalik Snapdragon X Elite hamda Plus chipli qurilmalar uchun sinov tariqasida qaytarilgan ushbu vosita endi Intel va AMD protsessorlariga ega Copilot+ kompyuterlarini ham qamrab oldi.

Microsoft juma oqshomida e'lon qilgan 26120.2510-sonli sinov versiyasi orqali ushbu funksiya Intel va AMD qurilmalarida ishlay boshlashini ma'lum qildi. Dasturiy ta'minot ishlab chiqaruvchisi sun'iy intellektga asoslangan vositalarning 24H2 yangilanishida bexato ishlashi uchun Windows Update orqali eng so'nggi drayverlarni o'rnatishni tavsiya etmoqda. Joriy bosqichda Recall ingliz, fransuz, nemis, xitoy, yapon va ispan tillarini qo'llab-quvvatlaydi.

Arm arxitekturali qurilmalardagi dastlabki sinov versiyasidan beri funksiyada sezilarli o'zgarishlar kuzatilmadi. Eslatib o'tamiz, o'tgan yozdagi keskin tanqidlardan keyin Recall mustaqil va o'chirib tashlash mumkin bo'lgan ilovaga aylantirilgan edi. Endilikda undan foydalanish uchun foydalanuvchining o'z roziligi talab etiladi, saqlanadigan ma'lumotlar esa shifrlangan bazada saqlanib, ularni ko'rish uchun maxsus autentifikatsiya zarur.

Microsoft xavfsizlik mutaxassislari va hamjamiyatiga o'z hissasi uchun minnatdorlik bildirib, foydalanuvchilar fikrini diqqat bilan kuzatib borishini ma'lum qildi. Intel va AMD protsessorli Copilot+ kompyuterlariga faqat Recall emas, balki boshqa sun'iy intellekt funksiyalari ham qo'shilmoqda. Jumladan, Paint dasturidagi Cocreator, Photos ilovasidagi tahrirlash vositalari va noyabr oyida Canary kanalida sinovdan o'tgan Windows Hello yangilanishlari shular jumlasidandir. Dev kanalidan so'ng bu yangiliklar Beta kanaliga o'tishi kutilmoqda, sinovlar qancha davom etishi hozircha noma'lum.