Nvidia Avstraliyada 2 gigavattli AI markazini quryapti 🇦🇺

Nvidia kompaniyasi Avstraliyada sunʼiy intellekt yoʻnalishidagi maʼlumotlar markazlarini kengaytirish uchun sakkizta yirik bulut va infratuzilma provayderlari bilan hamkorlik shartnomasini imzoladi. Unga koʻra, 2027-yilga qadar mamlakatda umumiy quvvati 2 gigavattgacha boʻlgan yirik sunʼiy intellekt infratuzilmasini barpo etish rejalashtirilgan. Bu qadam yuqori unumdor hisoblash tizimlariga boʻlgan talabning keskin oshgani bilan izohlanadi.

Loyiha doirasida Firmus, Sharon AI, IREN, Megaport, ResetData, CDC, NEXTDC va AirTrunk kabi kompaniyalar zarur yer maydonlari, elektr quvvati, obʼektlar hamda operatsion xizmatlarni taqdim etadi. Oʻz navbatida, Nvidia oʻzining toʻliq toʻplamdagi DSX platformasini, jumladan, tezlashtirilgan hisoblash uskunalari, tarmoq jihozlari, dasturiy taʼminot va maxsus loyihalarni yetkazib berishni oʻz zimmasiga oladi.

Yangi bunyod etilayotgan sunʼiy intellekt markazlari Avstraliyadagi startaplar, universitetlar, ilmiy tadqiqot institutlari, davlat idoralari va korxonalarga xorijiy infratuzilmalarga bogʻlanib qolmasdan, mahalliy darajada yuqori unumdor texnologiyalardan foydalanish imkoniyatini beradi. Masalan, Sharon AI tarmogʻi Quantum InfiniBand va Spectrum-X Ethernet orqali oʻzaro bogʻlangan 68 mingtagacha Nvidia grafik protsessorlarini ishga tushirishni rejalashtirmoqda. IREN esa Janubiy Avstraliyadagi Bundey kampusida Nvidia arxitekturasini tatbiq etadi.

Shuningdek, CDC, NEXTDC va AirTrunk kabi ishtirokchilar yangi avlod suyuq sovutish tizimlari hamda qayta tiklanuvchi energiya manbalaridan foydalanadigan zamonaviy markazlarini kengaytirmoqda. Hozircha tomonlar loyihaning umumiy qiymati va 2027-yil oxirigacha qancha quvvat amalda ishga tushishi haqidagi moliyaviy tafsilotlarni oshkor etmadi. Shu bilan birga, mazkur kengayish mahalliy foydalanuvchilarga Nvidia Nemotron ochiq sunʼiy intellekt modellaridan foydalanish imkoniyatini ham taqdim etishi aytilmoqda.