🎮 Sony Kojima loyihasidan nima sababdan voz kechdi?

PlayStation o'zining navbatdagi yirik loyihasidan voz kechgani o'yin sanoatida katta muhokamalarga sabab bo'ldi. Gap afsonaviy "Metal Gear Solid" yaratuvchisi Hideo Kojima va uning yangi avlodga mo'ljallangan "Physint" loyihasi haqida bormoqda. Sony kompaniyasi bu kelishuvdan chekingan bo'lsa-da, loyihaning o'zi to'xtab qolgani yo'q. Endilikda ushbu ambitsiyali loyiha PlayStation'ning asosiy raqibi bo'lgan Xbox tomonidan qo'llab-quvvatlanishi ma'lum qilindi va bu Microsoft uchun muhim PR yutug'i sifatida baholanmoqda.

Sony kompaniyasi avvalroq PlayStation Studios rahbari Herman Xulst va Kojima ishtirokidagi tantanali e'lonni ommaga namoyish etgan edi. Biroq kompaniyaning bu qaroridan orqaga qaytishi muxlislar orasida turli savollarni tug'dirmoqda. Xususan, bu paytda PlayStation'ning disklar siyosati va "Destiny 2" o'yinini rivojlantirish to'xtatilgani yuzasidan ham tanqidlar davom etayotgan edi.

Yaponiyaning Kantan Games tahliliy firmasi rahbari doktor Serkan Totoning fikricha, bunday keskin qarorga "Death Stranding 2: On the Beach" o'yinining savdo ko'rsatkichlari sabab bo'lgan bo'lishi mumkin. Birinchi qism va uning davomi o'rtasidagi to'g'ridan-to'g'ri taqqoslash qiyin, chunki Sony yoki Kojima Productions rasmiy savdo raqamlarini e'lon qilmagan. Shunga qaramay, Alinea Analytics kompaniyasining yangi tahliliga ko'ra, "Death Stranding 2" taxminan 2,5 million nusxada sotilgan.

Asl "Death Stranding" o'yini 2021-yil martigacha 5 million nusxada sotilgan bo'lib, 2025-yil martiga kelib uning o'yinchilari soni 20 millionga yetgan edi (bu ko'rsatkichga obuna xizmatlari va bepul aksiyalar orqali kirganlar ham kiradi). Iyul oyida esa Kojima Productions franshiza bo'ylab jami o'yinchilar soni 27 milliondan oshganini ma'lum qilgandi.

Tahlillarga ko'ra, "Death Stranding 2" o'yinining savdolari sekinlashgan va hatto chegirmalar ham vaziyatni o'zgartira olmagan. Gollivud yulduzlari ishtirokidagi yirik budjetli va uzoq davom etadigan bunday loyihalarning daromadi oldingi qismnikidan pastligi Sony'ni ehtiyotkorlikka undagan ko'rinadi.