Peyton Uotson va "Naggets" ajralishi tafsilotlari 🏀

"Denver Naggets" klubi va Peyton Uotson o'rtasidagi munosabatlarning buzilishiga sabab bo'lgan asosiy omillar o'tgan yilning oktyabr oyida boshlangan edi. "The Denver Post" nashri xabariga ko'ra, jamoa Kristian Braunga besh yillik yirik shartnoma taklif qilgan, biroq Uotson bilan bu borada kelishuvga erishilmagan. Tajribaliroq Braun asosiy tanlovga aylangan va bu qarorni yulduz markaziy o'yinchi Nikola Yokich ham qo'llab-quvvatlagan. O'shanda Uotson yiliga taxminan 14 million dollar talab qilgan, biroq klub rahbarligi 10 million dollardan ortiq mablag' berishni istamagan.

Mavsum davomida asosiy basketbolchilarning jarohat olishi Uotsonga o'zini ko'rsatish uchun imkoniyat yaratdi. U ajoyib o'yin ko'rsatib, klub rahbariyatining rejasini o'zgartira boshlagandi. Biroq 4-fevral kuni sodir bo'lgan son mushagining jarohati barchasini o'zgartirdi. 1-aprel kuni safga qaytgan basketbolchi o'sha jarohatini yana yangilab oldi va mavsum oxiri hamda Minnesota bilan kechgan pley-off bahslarini o'tkazib yuborishga majbur bo'ldi.

Jarohatdan keyingi tiklanish jarayoni ham tomonlar o'rtasida tushunmovchiliklarga sabab bo'ldi. Uotson o'z vaqtidan oldin maydonga qaytarishga majbur qilinganini ta'kidlagan bo'lsa, klub manbalari basketbolchi shartnoma qiymatini saqlab qolish uchun maydonga tushishni ataylab cho'zganini da'vo qilishdi. Basketbolchining vakillari esa bu ayblovlarni keskin rad etib, agent Rich Pol uning sog'lig'ini o'ylab shunday qarorga kelganini bildirishdi.

Yozgi transferlar davrida "Naggets" moliyaviy ahvolini o'nglab, Uotsonni saqlab qolish uchun maoshlarni qisqartirish yo'llarini qidirgan. Biroq boshqa jamoalar ularning og'ir ahvalidan foydalanishga urinib, past takliflar berishgan. Jumladan, Kemeron Jonsonning shartnomasini qabul qilish uchun draft huquqlarini talab qilishgan. Yakunda jamoa qulay takliflarni rad etib, Uotson bilan xayrlashishga majbur bo'lgan.