"Yashil makon" bo'yicha yangi farmon 🌳

Mamlakatimizda ekologik barqarorlikni ta'minlash, "Yashil makon" umummilliy loyihasini yanada takomillashtirish hamda o'rmonlarni boshqarish sohasidagi islohotlarni izchil davom ettirishga qaratilgan muhim huquqiy hujjat imzolandi. Shu munosabat bilan qabul qilingan davlat rahbarining farmonida yashil hududlarni kengaytirish va tabiatni muhofaza qilishning ustuvor yo'nalishlari belgilab berildi.

Hujjatga ko'ra, kelgusi yilning boshidan e'tiboran ekiladigan daraxt va buta ko'chatlarining ko'karish ko'rsatkichlari, ularning tashqi ta'sirlarga hamda zararkunandalarga chidamliligini oshirish bo'yicha aniq vazifalar ijroga yo'naltiriladi. Xususan, urug'chilik laboratoriyalarida hudumlarning iqlim xususiyatlariga mos keladigan o'simlik turlaridan onalik plantatsiyalarini barpo etish ko'zda tutilgan. Shuningdek, davlat o'rmon xo'jaliklari tomonidan yetkazib beriladigan ko'chatlar miqdorini ikki karra ko'paytirish ta'minlanadi.

Aholi ishtirokini kuchaytirish va shaffoflikni ta'minlash maqsadida joriy yilning oktabr oyidan boshlab "Yashil makon" elektron platformasida raqamlashtirish mexanizmlari ishga tushiriladi. Endilikda fuqarolar tashabbusi bilan daraxt ekish mumkin bo'lgan hududlarni aniqlash, ularning sug'orish tizimi, parvarishlash imkoniyatlari hamda navlarini ko'rsatib borish amaliyoti joriy etiladi. Buning ortidan qimmatbaho daraxt va butalarni noqonuniy kesganlar tomonidan kompensatsiya tariqasida ekiladigan ko'chatlar hisobini yuritish tartibi ham yo'lga qo'yiladi.

Bundan tashqari, joriy yilning noyabr oyidan boshlab o'rmon fondiga tegishli yer maydonlari qат'iy muhofazaga olinadi. Ushbu toifadagi yerlarning maqomini o'zgartirish masalalari faqatgina O'zbekiston Respublikasi Prezidentining tegishli qaroriga asosan amalga oshirilishi belgilandi.