Serdar Berdimuhamedov prezidentlikka nomzod 🇹🇲

Туркманистон раҳбари Гурбангули Бердимуҳамедовнинг фарзанди Сердар Бердимуҳамедов олдинда бўлиб ўтадиган давлат раҳбари сайловида президентликка номзод сифатида кўрсатилди. Мазкур янгилик Salam News нашри томонидан оммага етказилди.

Хабар берилишича, шу йилнинг 14 февраль санасида Туркманистон демократик партиясининг навбатдан ташқари тўққизинчи съезди ташкил этилди. Ушбу йиғилиш кун тартибига мувофиқ, республика бош вазирининг ўринбосари лавозимида фаолият юритиб келаётган Сердар Гурбангулиевич Бердимуҳамедовнинг номзоди илгари сурилди. Съезд қатнашчилари сиёсатчининг нутқини тинглаб, уни тўлиқ қўллаб-қувватлашди.

Маълумот ўрнида, Сердар Бердимуҳамедов 1981 йилда таваллуд топган бўлиб, Туркманистон қишлоқ хўжалик университетини тамомлаган. Шунингдек, у 2008–2011 йилларда Россия Ташқи ишлар вазирлигининг дипломатия академиясида, кейинроқ эса 2011–2013 йилларда Женева шаҳридаги хавфсизлик сиёсати марказида ўз билим ва малакасини ошириб, таҳсил олган.

Сиёсий фаолияти давомида у турли масъулиятли лавозимларда ишлаган. Хусусан, 2018 йилда ташқи ишлар вазирининг ўринбосари этиб тайинланган бўлса, 2020 йилда саноат ва қурилиш вазири лавозимини эгаллаган. Сердар Бердимуҳамедов 2021 йилнинг февраль ойидан буён бош вазир ўринбосари сифатида ишлаб келмоқда.

Расмий маълумотларга кўра, Туркманистонда навбатдан ташқари президент сайлови жорий йилнинг 12 март куни бўлиб ўтади.