Trezor yana kiberxavfsizlik muammosiga duch keldi 🚨

Mashhur hamyon ishlab chiqaruvchisi Trezor yana bir bor xavfsizlik muammosiga duch keldi. Bunga kompaniyaning uchinchi tomon elektron pochta xizmati hamkori Brevo tizimiga kiberhujum uyushtirilgani sabab bo‘ldi. Natijada Trezor foydalanuvchilari fishing xatlariga duch kelishdi.

Hodisa ortidan hamyon yaratuvchilari o‘zlarining pochta domeniga xakerlar kirishga muvaffaq bo‘lganini maʼlum qildi. Kompaniya mazkur domenni vaqtincha yopib qo‘ydi va hozirda yuzaga kelgan holat yuzasidan rasmiy surishtiruv ishlarini boshlab yubordi.

Protos nashriga berilgan maʼlumotlarga ko‘ra, taxminan 347,000 nafar Trezor axborotnomasi obunachilari bu holatdan jabr ko‘rgan. Ularning elektron pochta manzillari hujumchilar qo‘liga tushgani va kelgusida fishing maqsadlarida foydalanilishi mumkinligi aytilmoqda. Shu bilan birga, Trezor vakillari Brevo tizimida foydalanuvchilarning parollari, hamyon maʼlumotlari yoki boshqa shaxsiy maʼlumotlari saqlanmaganini alohida taʼkidladilar.

Firibgarlar obunachilarga go‘yo xavfsizlikka tahdid borligi haqida ogohlantirishlar yuborib, ularni maxfiy kalit zaxiralarini taqdim etishga undashga harakat qilishgan. Maʼlum bo‘lishicha, Brevo xizmatidan BitBox, CoinTracking, Peach Bitcoin va Blocktrainer kabi boshqa kripto kompaniyalari ham foydalanadi va ularning barchasi o‘z foydalanuvchilarini hushyorlikka chaqirgan.

Trezor uchun bu yozgi mavsum ancha qiyin keldi. Avvalroq, avgust oyida kompaniyaning ShipMonk yetkazib berish hamkori ham buzib kirilib, 13,689 nafar xaridorning maʼlumotlari sizib chiqqani maʼlum qilingan edi. Keyinchalik bu ko‘rsatkich 80 mingdan oshishi va hamkor maʼlumotlarni o‘chirish siyosatiga amal qilmagani aniqlangandi. Shunga qaramay, Trezor kompaniyasi 12 yil davomida ularning qurilmalari yoki Trezor Suite ilovasi orqali birorta ham mablag‘ yoki maxfiy kalit xavf ostida qolmaganini bildirdi.