🎮 Sony: raqamli o'yinlar hech qachon sizniki emas

Sony kompaniyasi raqamli o'yinlar egaligi borasidagi qizg'in bahslar markaziga qaytdi. Kaliforniya sudida ko'rib chiqilayotgan jamoaviy da'vo yuzasidan ilk rasmiy javobini taqdim etgan yapon giganti muhim bayonotni e'lon qildi. Kompaniyaning ta'kidlashicha, oqilona o'ylaydigan har qanday iste'molchi PlayStation Store do'konida xarid tugmasini bosganda videoo'yinni to'liq sotib olayotganini emas, balki shunchaki foydalanish huquqini beruvchi litsenziyani qo'lga kiritayotganini tushunishi kerak.

Bu muhokama PlayStation uchun o'ta nozik pallaga to'g'ri kelmoqda. Ma'lum qilinishicha, kompaniya kelgusi yillarda disk formatidan voz kechishni rejalashtirmoqda. Xususan, kelgusida chiqariladigan qurilmalar disk o'quv moslamasidan mahrum bo'lishi kutilmoqda, bu esa foydalanuvchilarga faqat raqamli kontentni xarid qilish imkonini qoldiradi. Biroq yangi qoidalarga ko'ra, xaridorlar o'yinning o'ziga emas, balki uni ishga tushirish huquqini beruvchi ruxsatnomagagina ega chiqishadi.

Sud jarayoni joriy yilning 18 iyun sanasida Kaliforniya Shimoliy okrug okrug sudida boshlangan edi. Bir guruh da'vogarlar Sony kompaniyasiga qarshi sudga murojaat qilib, PlayStation Store do'koni raqamli o'yinlar aslida mulk emas, litsenziya ekanligini yetarlicha ochiq va ko'zga ko'rinarli tarzda tushuntirmasligini da'vo qilishgan. Da'vogarlarning fikricha, interfeysda "Sotib olish" kabi savdo iboralari qo'llanilib, bu haqdagi ma'lumotlar esa murakkab huquqiy matnlar orasiga yashirib qo'yilgan.

Mazkur bahs shtatda qabul qilingan qonunchilik talablariga ham borib taqaladi. Ushbu qoidalar raqamli tovarlar uchun xarid so'zlaridan foydalanishga ruxsat bersa-da, do'konlar litsenziya berilishini aniq va ko'zga tashlanadigan tarzda ogohlantirishi shartligini talab qiladi. Shu bilan birga, bu ogohlantirish asosiy shartnomalardan alohida ko'rsatilishi lozim. Sony esa hozirning o'zida to'lov jarayonida mahsulot litsenziya ekanligi haqida ogohlantirish ko'rsatilishini va huquqiy kelishuvlarda dasturiy ta'minot sotilmagani, balki litsenziyalangani qat'iy belgilanganini bildirib, o'z pozitsiyasini himoya qilmoqda.