Vadim Nemkov og'ir vaznga o'tdi 🥊

Bellator tashkilotining yarim og'ir vazndagi amaldagi chempioni va vazn toifasidan qat'i nazar uning eng yaxshi jangchisi Vadim Nemkov faoliyatini og'ir vazn toifasida davom ettiradigan bo'ldi. Uning navbatdagi jangi 24-fevral sanasida Saudiya Arabistonida tashkil etiladigan PFL va Bellator qo'shma turniri doirasida o'tkazilishi rejalashtirilgan.

Mazkur xabar bo'yicha izoh bergan sportchining ustozi, afsonaviy jangchi Fedor Emelyanenko shogirdi yarim og'ir vaznda barcha raqiblarini mag'lub etib, birinchi raqamli maqomini olganini va endilikda og'ir vaznga o'tishga qaror qilganini ta'kidladi. "Arhangel Mixail" klubi matbuot xizmatining ma'lum qilishicha, jamoa bo'lajak raqibni yaxshi biladi va unga qarshi tayyorgarlik ko'rmoqda, biroq promushen rasman e'lon qilmaguncha uning nomini ochiqlay olmaydi.

Avvalroq bergan intervyularidan birida 31 yoshli rossiyalik sportchi unga Bellator chempioni Xenan Ferreyra yoki PFL va Bellator birlashgan rosteridagi boshqa og'ir vaznli jangch raqib bo'lishi mumkinligini aytib o'tgan edi. Eslatib o'tamiz, Vadim Nemkov Bellator promushenida o'nta jang o'tkazib, ularning birortasida ham mag'lubiyatga uchramagan.

Rossiyalik jangchi oxirgi marta o'tgan yilning iyun oyida oktagonga chiqqan bo'lib, o'shanda hakamlarning bir ovozdan qabul qilgan qarori bilan Yoel Romeroni mag'lub etib, o'z chempionlik kamarini muvaffaqiyatli himoya qilgandi. 24-fevral kuni bo'lib o'tadigan yirik qo'shma turnirning asosiy voqealari sifatida ikkala liganing chempionlari ishtirokidagi superjanglar tashkil etilishi kutilmoqda.