Hyunjung Li "Trail Bleyzers" safiga qo'shiladi 🏀

Janubiy koreyalik iqtidorli basketbolchi Hyunjung Li "Portland Trail Blazers" jamoasi bilan "Exhibit 10" turdagi shartnoma imzolashi kutilmoqda. Bu haqda taniqli insayder Shon Haykin o'z manbalariga tayanib xabar berdi. Ma'lum qilinishicha, bo'yi 2 metr 1 santimetr bo'lgan hujumchi Portlend klubining yig'inida ishtirok etadi va kelgusi mavsumni asosan NBA G Ligasida harakat qiluvchi "Rip City Remix" farm-jamoasida davom ettiradi.

Liningsobiq jamoasi bo'lmish Yaponiyaning "B.League" chempionatida qatnashuvchi "Nagasaki Velca" klubi uning ketayotganini rasman e'lon qildi va basketbolchiga NBA orzusini amalga oshirishda omad tiladi. O'tgan mavsumda Nagasaki jamoasini chempionlikka yetaklagan Li turnirning eng yaxshi o'yinchisi (MVP) deb topilgan edi. Shuningdek, u Avstraliyaning "Illawarra Hawks" safida ham chempionlikni qo'lga kiritgan.

"Janubiy Koreya ofariysi" deb nom qozongan sportchi yozgi Liganing San-Antonio jamoasi tarkibida yaxshi o'yin namoyish etdi. Sakkizta uchrashuvda qatnashgan Li o'rtacha 8.6 ochko, 3.8 ta ribaund va 1.1 ta golli uzatmani amalga oshirdi. Universitet yillarida "Davidson" safida to'p surgan basketbolchi draftdan o'ta olmagach, faoliyatini G Liga va xorijiy chempionatlarda davom ettirgandi.

Imzolanadigan "Exhibit 10" shartnomasiga ko'ra, agar Li "Rip City Remix" safida kamida 60 kun o'tkazsa, o'zining asosiy maoshidan tashqari 91 ming dollargacha bo'lgan maxsus bonusga ega bo'lishi mumkin. Hozirda Portlend klubida 18 nafar basketbolchi shartnoma asosida harakat qilmoqda va Lining kelishuvi rasmiylashgach, jamoa yig'in uchun yana ikki nafar o'yinchini qo'shib olish imkoniyatiga ega bo'ladi.