Катанец Малайзия билан ўйин ҳақида ⚽

Кеча Ўзбекистон миллий терма жамоаси навбатдаги ўртоқлик учрашувини ўтказиб, Малайзия терма жамоасини йирик 5:1 ҳисобида доғда қолдирди. Муҳим баҳсдан кейин миллий жамоамиз бош мураббийи Сречко Катанец журналистлар ва мухлислар саволларига жавоб бериб, учрашув борасидаги ўз фикрлари билан ўртоқлашди.

Ўз сўзида мутахассис дастлаб футболчиларни ғалаба билан табриклади. Унинг сўзларига кўра, рақиб жуда машҳур ва номдор бўлмаса-да, футболчилар майдонга ўта жиддий ёндашган. Учрашув давомида суръат тушиб кетмагани ва кўрсатилган профессионаллик бош мураббий томонидан алоҳида эътироф этилди. Катанец жамоа сифатида яхши ҳаракат қилинганини таъкидлаб, фақат янги футболчиларни алоҳида ажратиб кўрсатиш нотўғри бўлишини, бироқ дебют қилганлар ҳам яхши таассурот қолдирганини қўшимча қилди.

Мухлисларга баҳс осон кечгандек туюлган бўлса-да, амалда бундай бўлмагани қайд этилди. Терма жамоа тўқсон дақиқа давомида агрессив ўйин намойиш этишга интилган. Майдон марказидаги курашларда фаоллик кўрсатилиб, тўлиқ прессинг тактикаси қўллангани мураббийни қувонтирган.

Учрашувда дарвозамиздан битта тўп олиб чиқилганига ҳам изоҳ берилди. Катанецнинг фикрича, бу вазиятда фақатгина ҳимоячиларни айблаш нотўғри бўлади. Бўлим охирида на ҳужумда ва на майдон марказида фаол прессинг амалга оширилгани рақибнинг гол уришига сабаб бўлган. Шунга қарамай, бош мураббий умумий ҳисобда ҳимоя чизиғининг ҳаракатларидан қониқиш ҳосил қилганини билдирди.