🛡 Dunyoning eng yirik mudofaa budjetlari

Stokholm tinchlikni o‘rganish xalqaro instituti (SIPRI) e’lon qilgan hisobotga ko‘ra, 2021 yilda dunyo bo‘yicha harbiy xarajatlar miqdori rekord ko‘rsatkichni qayd etdi. Tarixda ilk bor global mudofaa xarajatlari 2 trillion dollardan oshib, 2 113 milliard dollarni tashkil qildi. Ushbu mablag‘larning asosiy qismi bir nechta yirik davlatlar hissatsiga to‘g‘ri keladi.

Ma’lumotlarga ko‘ra, AQSH, Xitoy, Hindiston, Buyuk Britaniya va Rossiya 2021 yilda eng ko‘p harbiy xarajatlarga ega bo‘lgan davlatlar sifatida qayd etildi. Mazkur beshlikning umumiy xarajatlari global miqyosdagi ko‘rsatkichning 62 foizini tashkil qilgan.

Qo‘shma Shtatlar mazkur reytingda yaqqol yetakchi bo‘lib qolmoqda. 2021 yilda mamlakatning mudofaa xarajatlari 801 milliard dollarni tashkil etgan bo‘lib, bu 2020 yilga nisbatan 1,4 foizga kamdir. So‘nggi o‘n yillikda AQSH harbiy tadqiqotlar va ishlanmalarga ko‘proq mablag‘ yo‘naltirib, yangi avlod texnologiyalariga e’tibor qaratmoqda.

Ikkinchi o‘rinni egallagan Xitoy o‘z mudofaa budjetini ketma-ket 27 yil davomida oshirib kelmoqda. Pekin 2021 yilda armiyani qurollantirish va modernizatsiya qilishga 293 milliard dollar sarfladi. Garchi xarajatlar oshgan bo‘lsa-da, mamlakat Yalpi ichki mahsulotining o‘sishi fonida harbiy xarajatlarning YAIMga nisbatan ulushi biroz kamaydi.

Reytingning keyingi o‘rinlaridan Hindiston va Buyuk Britaniya joy oldi. 2021 yilda Dehlining harbiy xarajatlari 76,6 milliard dollarni tashkil etgan bo‘lsa, Buyuk Britaniya bu maqsadlar uchun 68,4 milliard dollar sarflagan. Rossiya esa ushbu ro‘yxatda beshinchi o‘rinni egalladi.