🚀 NVIDIA RTX 5090 unumdorligi oshdi!

Yangi avlod NVIDIA RTX 50 seriyali grafik kartalarining bozora chiqish vaqti yaqinlashgani sayin, ular haqidagi turli mish-mishlar va sizdirilgan maʼlumotlar koʻpayib bormoqda. Ushbu safar Videocardz nashri orqali eng kuchli model hisoblangan NVIDIA RTX 5090 kartasining 3DMark testlaridagi unumdorlik koʻrsatkichlari maʼlum boʻldi. Ushbu yangi grafik karta oʻzidan oldingi RTX 4090 modelini taxtdan tushirish uchun salmoqli yangilanishlar bilan kelmoqda.

Tarqatilgan maʼlumotlarga koʻra, turli 3DMark sinovlarida qayd etilgan ballar boshqa avlod modellari bilan taqqoslab chiqilgan. Eng qudratli hisoblangan ushbu flagman FireStrike sinovining Performance, Extreme hamda Ultra bosqichlarida taxminan 36 foiz yuqori natija koʻrsatishi kutilmoqda. Shuningdek, TimeSpy sinovining Performance va Extreme yoʻnalishlarida unumdorlik 33 foizga oshgani koʻringan.

Eng eʼtiborga molik jihati shundaki, Ray Tracing texnologiyasiga ixtisoslashgan Speed Way, Port Royal va Steel Nomad sinovlarida yangi karta 46 foizgacha yuqori natija qayd etgan. Shunga qaramay, bu kabi sintetik testlar har doim ham oʻyinlardagi real imkoniyatlarni toʻliq koʻrsata olmasligi hammaga maʼlum. Mutaxassislarning fikricha, RTX 5090 modeli real oʻyin jarayonida joriy RTX 4090 flagmaniga nisbatan taxminan 20 foiz yaxshiroq natija taqdim eta oladi.

Shu sababli, aniqroq xulosaga kelish uchun ushbu quvvatli grafik kartaning rasmiy taqdimotini kutish maqsadga muvofiqdir. Shundan soʻnggina nafaqat 3DMark sinovlari, balki Cyberpunk 2077 kabi talabchan oʻyinlardagi real imkoniyatlar asosida toʻliq maʼlumot olish mumkin boʻladi.